ട്രെയിൻ യാത്രയിൽ മുതിർന്ന പൗരന്മാർക്ക് ലോവർ ബെർത്ത് ഉറപ്പിക്കാം; ഈ ബുക്കിങ് നിയമം ശ്രദ്ധിക്കാം.

ദൂരയാത്രകൾ ഇഷ്ടപ്പെടുന്ന മുതിർന്ന യാത്രികർക്ക് ഏറ്റവും വലിയ തലവേദനയാണ് അപ്പർ ബർത്തുകൾ (Upper Berths). താഴത്തെ ബർത്ത് (Lower Berth) ലഭിക്കാതെ വരുമ്പോൾ ഉണ്ടാകുന്ന ബുദ്ധിമുട്ട് ചെറുതല്ല. മുതിർന്ന പൗരന്മാർക്ക് ലോവർ ബെർത്ത് ലഭിക്കാൻ റെയിൽവേ മുൻഗണന നൽകുന്നുണ്ടെങ്കിലും പലപ്പോഴും അതു ലഭിക്കാത്തതിന്റെ രഹസ്യം ഒരു ട്രാവലിംഗ് ടിക്കറ്റ് എക്സാമിനർ (TTE) ഇപ്പോൾ വെളിപ്പെടുത്തിയിരിക്കുകയാണ്!

ദിബ്രുഗഡ് രാജധാനി എക്സ്പ്രസ് യാത്രയ്ക്കിടെ, ടിക്കറ്റ് പരിശോധനയ്ക്കിടെയാണ് നാല് മുതിർന്ന യാത്രികർ തങ്ങൾക്ക് ലോവർ ബെർത്ത് ലഭിക്കാത്തതിന്റെ കാരണം TTE-യോട് ചോദിച്ചത്. അവരുടെ ചോദ്യത്തിനുള്ള TTE-യുടെ മറുപടി, എല്ലാ ട്രെയിൻ യാത്രികരും അറിഞ്ഞിരിക്കേണ്ട ഒരു സുപ്രധാന കാര്യമാണ്.

എന്തുകൊണ്ട് ലോവർ ബെർത്ത് നഷ്ടപ്പെടുന്നു?

നിങ്ങൾ ലോവർ ബെർത്തിന് അർഹരാണെങ്കിലും അത് ലഭിക്കാതെ പോകുന്നതിന് പിന്നിലെ പ്രധാന കാരണം ബുക്കിങ്ങിലെ പിശകാണ്. ഇന്ത്യൻ റെയിൽവേയുടെ ബുക്കിങ് സിസ്റ്റം മുതിർന്ന പൗരന്മാർക്കായി പ്രത്യേക ക്വാട്ട അനുവദിക്കുമ്പോൾ ശ്രദ്ധിക്കേണ്ട പ്രധാന കാര്യം ഇതാണ്:

അർഹത: 60 വയസ്സിന് മുകളിലുള്ള പുരുഷന്മാരെയും 45 വയസ്സിന് മുകളിലുള്ള സ്ത്രീകളെയുമാണ് മുതിർന്ന പൗരന്മാരായി (Senior Citizens) റെയിൽവേ കണക്കാക്കുന്നത്.

ഗോൾഡൻ റൂൾ (PNR നിയമം): ഈ ക്വാട്ടയുടെ ആനുകൂല്യം ലഭിക്കണമെങ്കിൽ, ഒരു പി.എൻ.ആർ (PNR) നമ്പറിൽ പരമാവധി രണ്ട് യാത്രക്കാർക്ക് മാത്രമേ ടിക്കറ്റ് ബുക്ക് ചെയ്യാൻ പാടുള്ളൂ.

പിഴവ്: ഒരേ ടിക്കറ്റിൽ മൂന്നോ അതിലധികമോ പേരെ ഉൾപ്പെടുത്തി ബുക്ക് ചെയ്യുമ്പോൾ, സിസ്റ്റം ഇതിനെ മുതിർന്ന പൗരൻ ക്വാട്ടയായി പരിഗണിക്കാതെ ജനറൽ ക്വാട്ടയിലേക്ക് മാറ്റുന്നു. ഇതോടെ നിങ്ങൾക്ക് ലോവർ ബെർത്ത് ലഭിക്കാനുള്ള സാധ്യത കുറയുന്നു.

ചുരുക്കത്തിൽ: മുതിർന്ന പൗരന്മാർ ഒരുമിച്ച് യാത്ര ചെയ്യുമ്പോൾ, ഓരോ രണ്ടു പേർക്കും പ്രത്യേകം PNR വഴി ടിക്കറ്റ് ബുക്ക് ചെയ്യുക. ഇത് ലോവർ ബെർത്ത് ഉറപ്പാക്കാൻ സഹായിക്കും.

മറ്റ് പ്രധാന കാര്യങ്ങൾ

സബർബൻ സർവീസുകൾ: എല്ലാ സോണൽ റെയിൽവേകളിലെയും സബർബൻ സെക്ഷനുകളിൽ, ആദ്യത്തെയും അവസാനത്തെയും സെക്കൻഡ് ക്ലാസ് ജനറൽ കംപാർട്ട്‌മെന്റുകളിൽ ഏഴ് സീറ്റുകൾ മുതിർന്ന പൗരന്മാർക്കായി സംവരണം ചെയ്തിട്ടുണ്ട്.

തിരിച്ചറിയൽ രേഖ: ടിക്കറ്റ് ബുക്ക് ചെയ്യുമ്പോൾ പ്രായം തെളിയിക്കുന്ന രേഖകൾ ആവശ്യമില്ലെങ്കിലും, യാത്രയ്ക്കിടെ പ്രായം തെളിയിക്കുന്ന സാധുവായ തിരിച്ചറിയൽ രേഖ കൈവശം വെക്കുകയും TTE ആവശ്യപ്പെട്ടാൽ ഹാജരാക്കുകയും വേണം.