5ജി സേവനങ്ങൾ ഉടൻ അവതരിപ്പിക്കും, തയ്യാറെടുപ്പുകൾ നടത്തി വോഡഫോൺ- ഐഡിയ

രാജ്യത്ത് 5ജി സേവനങ്ങൾ ഉടൻ അവതരിപ്പിക്കാൻ ഒരുങ്ങുകയാണ് പ്രമുഖ ടെലികോം സേവന ദാതാക്കളായ വോഡഫോൺ- ഐഡിയ. പലപ്പോഴും കവറേജ് കുറവായതിനാൽ പലരും വോഡഫോൺ- ഐഡിയയിൽ നിന്നും മറ്റു സിം കാർഡുകളിലേക്ക് പോർട്ട് ചെയ്യാറാണ് പതിവ്. എന്നാൽ, കവറേജ് കുറവിന് പരിഹാരമെന്ന നിലയിലാണ് വോഡഫോൺ- ഐഡിയ അതിവേഗത്തിൽ 5ജി സേവനങ്ങൾ ആരംഭിക്കുന്നത്.

നിലവിൽ, 5ജി സേവനവുമായി ബന്ധപ്പെട്ട ഔദ്യോഗിക തീയതികൾ കമ്പനി പുറത്തുവിട്ടിട്ടില്ല. അൾട്രാ- ഹൈ സ്പീഡ് ഇന്റർനെറ്റ് സേവനങ്ങളുടെ ആരംഭത്തിനോ കവറേജിനോ ഉള്ള സമയക്രമങ്ങളെക്കുറിച്ചും കമ്പനി വ്യക്തമാക്കിയിട്ടില്ല. മറ്റ് ടെലികോം സേവന ദാതാക്കളെപ്പോലെ ഉടൻ തന്നെ 5ജി സേവനം വോഡഫോൺ- ഐഡിയ ലഭ്യമാക്കുമെന്നാണ് വിലയിരുത്തൽ.

അടുത്ത വർഷം മാർച്ച് മാസത്തോടെ വിവിധ നഗരങ്ങളിലും, 2024 ഓടെ രാജ്യത്തുടനീളവും 5ജി സേവനങ്ങൾ അവതരിപ്പിക്കാൻ എയർടെൽ പദ്ധതിയിടുന്നുണ്ട്. അതേസമയം, 2023 ഡിസംബറോടു കൂടി മുഴുവൻ നഗരങ്ങളിലും 5ജി ഉറപ്പുവരുത്താനാണ് റിലയൻസ് ജിയോയുടെ ലക്ഷ്യം.