ദേശീയപാതയിലെ വെളിച്ചം ​കനത്ത ബില്ലുമായി വൈദ്യുതി വകുപ്പ് തടസ്സവുമായി നിർമാണ ഏജൻസി

​ ദേശീയപാത-66 ൽ പ്രകാശിക്കുന്ന വഴിവിളക്കുകൾക്ക് കനത്ത ബില്ല് നൽകി വൈദ്യുതി വകുപ്പ്. തെരുവുവിളക്കുകൾക്ക് താരിഫ് മാറ്റം വേണമെന്ന് കാണിച്ച് നിർമാണ ഏജൻസിയായ സിങ്കാറയ്ക്ക് കെ.എസ്.ഇ.ബി. കത്ത് നൽകി. പുതിയ ഉത്തരവ് പ്രകാരം വൻ വർദ്ധനവാണ് ദേശീയപാതയിലെ വിളക്കുകൾക്ക് അടക്കേണ്ടത്. സർക്കാർ/തദ്ദേശ സ്ഥാപന ഫണ്ട് ഉപയോഗിച്ച് സ്ഥാപിച്ച് പരിപാലിക്കുന്ന തെരുവുവിളക്കുകൾക്ക് (എൽ.ടി. എട്ട് താരിഫ്) പ്രകാരം യൂണിറ്റിന് അഞ്ചുരൂപയാണ് അടക്കേണ്ടത്. ഇതാണ് ദേശീയപാതയിലെ വഴിവിളക്കുകൾക്കും ഈടാക്കുന്നത്. ടാക്സ് പിരിക്കുന്നതിനാൽ പൊതു വഴിവിളക്ക് സംവിധാനത്തിൽ ദേശീയപാതയെ ഉൾപ്പെടുത്താൻ കഴിയില്ലെന്ന നിലപാടിലാണ് കെ.എസ്.ഇ.ബി.

​ഇനി വാണിജ്യനിരക്കിലുള്ള പുതിയ താരിഫ് (എൽ.ടി. ഏഴ് എ.) പ്രകാരം ബിൽത്തുക അടക്കാൻ കെ.എസ്.ഇ.ബി നിർദേശം നൽകി. യൂണിറ്റിന് ഒൻപത്-11 രൂപ വർദ്ധിക്കും. വൈദ്യുതി വകുപ്പിന്റെ താരിഫ് ആൻഡ് റെഗുലേറ്ററി അഫയേഴ്സ് സെൽ (ട്രാക്) നിർദേശ പ്രകാരമാണിത്.

​കോടികളുടെ ബിൽ

​ഓരോ റീച്ചിലും വിളക്കുകൾക്ക് വൈദ്യുതി നൽകുന്നത് കെ.എസ്.ഇ.ബി. ആണ്. ദേശീയപാതാ അതോറിറ്റിയുടെ പേരിലാണ് കണക്ഷൻ. 15 വർഷത്തേക്ക് നിർമാണ ഏജൻസി തുക അടക്കും. തെരുവുവിളക്കിന്റെ താരിഫ് (ഏകദേശം ഒരു യൂണിറ്റിന് അഞ്ചുരൂപ) പ്രകാരമാണ് നിരക്ക് നൽകുന്നത്.

​നിർമാണം പൂർത്തിയായി തുറന്നുകൊടുത്ത തലപ്പാടി-ചെങ്കള റീച്ചിൽ നിലവിൽ 3400 ബൾബുകളാണ് പ്രകാശിക്കുന്നത്. ഇപ്പോൾ പഴയ താരിഫ് പ്രകാരം ഒരുമാസം 16 ലക്ഷം രൂപയാണ് ബിൽത്തുക അടക്കുന്നത്.

​ഇനി 32 ലക്ഷത്തിലധികം രൂപ അടക്കേണ്ടിവരും. കെ.എസ്.ഇ.ബി. ബിൽ നൽകിയെങ്കിലും നിർമാണ ഏജൻസി അടക്കാൻ തയ്യാറായിട്ടില്ല. താരിഫ് മാറ്റം സംബന്ധിച്ച് പരാതിയിലാണ് (കേസ്) നിർമാണ ഏജൻസി ഉള്ളത്. മഹാരാഷ്ട്രയിൽ ഉൾപ്പെടെ ദേശീയപാത വെളിച്ചം പൊതുവിഭാഗത്തിലാണ് ഉൾപ്പെടുത്തിയിട്ടുള്ളത് എന്നാണ് വാദം.