സൗദിയിൽ നിന്ന് പ്രവാസികളുടെ പണമൊഴുക്ക് വർധിച്ചു; ഒക്ടോബറിൽ അയച്ചത് 1370 കോടി റിയാൽ

സൗദിയിൽ നിന്ന് പ്രവാസികളുടെ പണമൊഴുക്ക് വർധിച്ചു; ഒക്ടോബറിൽ അയച്ചത് 1370 കോടി റിയാൽ
റിയാദ്: സൗദി അറേബ്യയിൽ ജോലി ചെയ്യുന്ന പ്രവാസികൾ രാജ്യത്തിന് പുറത്തേക്ക് അയക്കുന്ന പണത്തിന്റെ (Remittance) അളവിൽ വർധന രേഖപ്പെടുത്തി. 2024 ഒക്ടോബർ മാസത്തിൽ മാത്രം പ്രവാസികൾ വിദേശത്തേക്ക് അയച്ചത് 13.70 ബില്യൺ റിയാലാണ്.

സൗദി സെൻട്രൽ ബാങ്ക് (SAMA) പുറത്തുവിട്ട കണക്കുകൾ പ്രകാരം, മുൻവർഷം ഒക്ടോബറിലെ കണക്കുകളുമായി താരതമ്യം ചെയ്യുമ്പോൾ പ്രവാസികളുടെ പണമിടപാടിൽ രണ്ട് ശതമാനം വർധനവുണ്ടായി. കൂടാതെ, സെപ്റ്റംബർ മാസത്തെ അപേക്ഷിച്ച് ഒക്ടോബറിൽ 314 മില്യൺ റിയാലിന്റെ വർധനവാണ് പ്രവാസി പണമിടപാടുകളിൽ ഉണ്ടായത്. ഇത് സൗദിയിലെ വിദേശ തൊഴിലാളികളുടെ വരുമാനത്തിലും സാമ്പത്തിക ഇടപാടുകളിലുമുണ്ടായ വർദ്ധനവിനെ സൂചിപ്പിക്കുന്നു.

സൗദി പൗരന്മാരുടെ പണമിടപാട്

അതേസമയം, സൗദി പൗരന്മാർ വിദേശത്തേക്ക് പണമയക്കുന്നതിലും മുൻ വർഷത്തെ അപേക്ഷിച്ച് വർധനവുണ്ടായി. ഈ വർഷം ഒക്ടോബറിൽ സൗദി പൗരന്മാർ അയച്ചത് 6.6 മില്യൺ റിയാലാണ്. ഇത് മുൻ വർഷത്തെ അപേക്ഷിച്ച് നാല് ശതമാനം വർധനവാണ് രേഖപ്പെടുത്തിയത്.