സ്ത്രീ സുരക്ഷാ പദ്ധതി: പ്രതിമാസം 1000 രൂപ ധനസഹായം; അപേക്ഷകൾ ഇന്ന് മുതൽ സമർപ്പിക്കാം

തിരുവനന്തപുരം: കേരളത്തിലെ സ്ത്രീകളുടെ ക്ഷേമം ലക്ഷ്യമിട്ട് സംസ്ഥാന സർക്കാർ ആവിഷ്കരിച്ച 'സ്ത്രീ സുരക്ഷാ പദ്ധതി'യുടെ അപേക്ഷാ നടപടികൾ ഇന്ന് (ഡിസംബർ 22) മുതൽ ആരംഭിക്കുന്നു. അർഹരായ ഗുണഭോക്താക്കൾക്ക് പ്രതിമാസം 1000 രൂപ വീതമാണ് ധനസഹായമായി ലഭിക്കുക. തദ്ദേശ സ്വയംഭരണ വകുപ്പിന്റെ ksmart.lsgkerala.gov.in എന്ന പോർട്ടൽ വഴി ഓൺലൈനായാണ് അപേക്ഷകൾ സമർപ്പിക്കേണ്ടത്.

ആർക്കൊക്കെ അപേക്ഷിക്കാം?

 * കേരളത്തിൽ സ്ഥിരതാമസക്കാരായ 35-നും 60-നും ഇടയിൽ പ്രായമുള്ള സ്ത്രീകൾക്കും ട്രാൻസ് വുമൺ വിഭാഗത്തിലുള്ളവർക്കും അപേക്ഷിക്കാം.

 * മഞ്ഞ (AAY), പിങ്ക് (PHH) റേഷൻ കാർഡുകൾ ഉള്ളവർക്കാണ് മുൻഗണന.

 * നിലവിൽ മറ്റ് സാമൂഹിക സുരക്ഷാ പെൻഷനുകളോ സർക്കാർ ധനസഹായങ്ങളോ കൈപ്പറ്റാത്തവരായിരിക്കണം

അയോഗ്യതകൾ

വിധവാ പെൻഷൻ, വികലാംഗ പെൻഷൻ, ഇ.പി.എഫ് ഉൾപ്പെടെയുള്ള സർവീസ് പെൻഷനുകൾ എന്നിവ വാങ്ങുന്നവർക്ക് ഈ പദ്ധതിയിൽ അംഗമാകാൻ കഴിയില്ല. കൂടാതെ സർക്കാർ/സർവ്വകലാശാല സ്ഥാപനങ്ങളിൽ സ്ഥിരമായോ കരാർ അടിസ്ഥാനത്തിലോ ജോലി ചെയ്യുന്നവരെയും പദ്ധതിയിൽ നിന്നും ഒഴിവാക്കിയിട്ടുണ്ട്.

ആവശ്യമായ രേഖകൾ

അപേക്ഷകർ പ്രായം തെളിയിക്കുന്ന രേഖ (സ്കൂൾ സർട്ടിഫിക്കറ്റ്/ആധാർ/പാസ്‌പോർട്ട്), ബാങ്ക് അക്കൗണ്ട് വിവരങ്ങൾ, ഐ.എഫ്.എസ്.സി കോഡ് എന്നിവ സമർപ്പിക്കണം. തെറ്റായ വിവരങ്ങൾ നൽകി ആനുകൂല്യം കൈപ്പറ്റിയാൽ 18 ശതമാനം പലിശ സഹിതം തുക തിരിച്ചുപിടിക്കുമെന്ന് അധികൃതർ മുന്നറിയിപ്പ് നൽകിയിട്ടുണ്ട്. ആനുകൂല്യം തുടരാൻ എല്ലാ വർഷവും കൃത്യമായി മസ്റ്ററിംഗ് നടത്തേണ്ടതുണ്ട്.