സൂപ്പര്‍ ലീഗ് കേരള; കണ്ണൂര്‍ വാരിയേഴ്‌സിന്റെ രണ്ടാം അങ്കം ഇന്ന്

      

*കണ്ണൂർ:* സൂപ്പര്‍ ലീഗ് കേരളയില്‍ രണ്ടാം ഹോം മത്സരത്തില്‍ കണ്ണൂര്‍ വാരിയേഴ്‌സ് എഫ്‌സി ഇന്ന് ഇറങ്ങും. രാത്രി 7.30 ജവഹര്‍ സ്റ്റേഡയത്തില്‍ നടക്കുന്ന മത്സരത്തില്‍ തിരുവനന്തപുരം കൊമ്ബന്‍സ് എഫ്‌സിയാണ് എതിരാളി.

ആദ്യ ഹോം മത്സരത്തില്‍ തൃശൂര്‍ മാജിക് എഫ്‌സികെതിരെ ആവസാന നിമിശം സമനിയ വഴങ്ങിയ ടീം വിജയിച്ച്‌ പോയിന്റ് പട്ടികയില്‍ മുന്നിലെത്താനാണ് ശ്രമിക്കുക.

*സ്റ്റേഡിയത്തില്‍ രണ്ട് ബോക്‌സ് ഓഫീസ് തുറന്നു*

കണ്ണൂര്‍ വാരിയേഴ്‌സ് എഫ്‌സിയും തിരുവനന്തപുരം എഫ്‌സിയും തമ്മിലുള്ള മത്സരത്തിന്റെ ടിക്കറ്റ് വില്‍പന ആരംഭിച്ചിട്ടുണ്ട്. ഓഫ് ലൈന്‍ ടിക്കറ്റുകള്‍ക്കായി സ്റ്റേഡിയത്തില്‍ രണ്ട് ബോക്‌സ് ഓഫീസുകള്‍ തുറന്നിട്ടുണ്ട്. ഒന്ന് സ്റ്റേഡിയത്തിലെ മാധവി മെഡിക്കല്‍ സ്റ്റോറിന് എതിര്‍വശവും രണ്ട് കൂള്‍ ലാന്‍ഡ് ഐസ്‌ക്രീം പാര്‍ലറിന് സമീപത്തുമാണ്. അതോടൊപ്പം കണ്ണൂരിലെ പുതിയതെരു, താഴെചൊവ്വ ഷോപ്രിക്‌സ് സൂപ്പര്‍ മാര്‍ക്കറ്റിന്റെ ഔട്ട് ലെറ്റുകളില്‍ നിന്നും ടിക്കറ്റുകള്‍ വാങ്ങാവുന്നതാണ്. ഓണ്‍ ലൈന്‍ ടിക്കറ്റുകള്‍ www.ticketgenie.in എന്ന വെബ് സൈറ്റിലോ, അപ്ലിക്കേഷനില്‍ നിന്നോ വാങ്ങാവുന്നതാണ്. കഴിഞ്ഞ മത്സരത്തില്‍ ടിക്കറ്റ് എടുത്ത് മത്സരം കാണാന്‍ സാധിക്കാത്തവര്‍ക്ക് ടിക്കറ്റുമായി എത്തി ബോക്‌സോഫീസില്‍ നിന്ന് മാറ്റി വാങ്ങാവുന്നതാണ്.

*പ്രവേശനം*

മത്സരം കാണാനെത്തുന്നവര്‍ ടിക്കറ്റുമായി വൈകീട്ട് 5.00 മുതല്‍ സ്റ്റേഡിയത്തിന് അകത്തേക്ക് പ്രവേശിക്കാം. തിരക്ക് നിയന്ത്രിക്കുന്നതിനുള്ള മുന്‍കരുതലായി ആണ് നേരത്തെ സ്റ്റേഡിയത്തിലേക്ക് പ്രവേശിപ്പിക്കുന്നത്. 7.15 ന് സ്റ്റേഡിയത്തിലെ പ്രവേശന ഗെയിറ്റുകള്‍ അടക്കും. അതിനാല്‍ നേരത്തെ തന്നെഎല്ലാവരും സ്റ്റേഡിയത്തില്‍ എത്താന്‍ ശ്രമിക്കണമെന്ന് ക്ലബ് അറിയിച്ചിട്ടുണ്ട്. കൂടാതെ സ്റ്റേഡിയത്തിന് ചുറ്റും വിവിധ സൈന്‍ ബോര്‍ഡുകളും സ്ഥാപിച്ചിട്ടുണ്ട്. അത് വഴി കൃത്യമായി കളികാണാനെത്തുന്നവര്‍ക്ക് ഗെയിറ്റുകള്‍ കണ്ടെത്താന്‍ സാധിക്കും.

ടിക്കറ്റില്‍ രേഖപ്പെടുത്തിയിട്ടുള്ള സ്ഥലത്തേക്ക് മാത്രമായിരിക്കും പ്രവേശനം. വി.വി.ഐ.പി., വി.ഐ.പി. ടിക്കറ്റുള്ളവര്‍ കണ്ണൂര്‍ ജില്ലാ സഹകരണ ബാങ്കിന് എതിര്‍ വശത്തെ ഗെയിറ്റ് നമ്ബര്‍ ഒന്നിലൂടെയാണ് സ്റ്റേഡിയത്തില്‍ പ്രവേശിക്കേണ്ടത്. മറൈനേഴ്‌സ് ഫോര്‍ട്ട് ടിക്കറ്റുള്ളവര്‍ ഗെയിറ്റ് നമ്ബര്‍ രണ്ടിലൂടെയും കിംസ് പ്രീമിയം ടിക്കറ്റുള്ളര്‍ ഗെയിറ്റ് മൂന്നിലൂടെയും എ.ബി.സി. ഗ്യാലറി ടിക്കറ്റുള്ളര്‍ ഗെയിറ്റ് നമ്ബര്‍ മൂന്ന്, നാല് വഴി അകത്തേക്ക് പ്രവേശിക്കാം. വെര്‍ട്ടൈല്‍ ഡിലക്‌സ് ടിക്കറ്റുകാരും ഗെയിറ്റ് നമ്ബര്‍ നാലിലൂടെയാണ് പ്രവേശിക്കേണ്ടത്. ഡി.ഡി.സി പാത്ത്‌ലാബ്‌സ് പ്രീമിയം, അസറ്റ് ഗ്യാലറി ടിക്കറ്റുള്ളവര്‍ ഏഴാം നമ്ബര്‍ ഗെയിറ്റ് വഴിയും നിക്ഷാന്‍ ഡിലക്‌സ് ടിക്കറ്റുക്കാര്‍ ആറാം നമ്ബര്‍ ഗെയിറ്റിലൂടെയും ആണ് സ്റ്റേഡിയത്തില്‍ പ്രവേശിക്കേണ്ടത്.

*മാനുവല്‍ സാഞ്ചസ് മികച്ച പരിശീലകന്‍*

സൂപ്പര്‍ ലീഗ് കേരളയില്‍ ഒക്ടോബര്‍ മാസത്തെ മികച്ച പരിശീലകനുള്ള അവര്‍ഡ് സ്വന്തമാക്കി കണ്ണൂര്‍ വാരിയേഴ്‌സ് എഫ്‌സി മുഖ്യ പരിശീലകന്‍ മാനുവല്‍ സാഞ്ചസ്. ഒക്ടോബര്‍ മാസത്തില്‍ നാല് മത്സരങ്ങള്‍ പൂര്‍ത്തിയായപ്പോള്‍ രണ്ട് ജയവും രണ്ട് സമനിലയുമായി തോല്‍വി അറിയാതെ കണ്ണൂര്‍ വാരിയേഴ്‌സ് മുന്നേറുകയായിരുന്നു. അതോടൊപ്പം ഒക്ടോബര്‍ മാസത്തിലെ മികച്ച ഇലവനില്‍ രണ്ട് കണ്ണൂര്‍ വാരിയേഴ്‌സ് താരങ്ങളും ഇടംപിടിച്ചു. പ്രതിരോധ താരം വികാസ് സൈനിയും മധ്യനിര താരം ഏണസ്റ്റീന്‍ ലവ്‌സാംബയുമാണ് ടീമില്‍ ഇടംപിടിച്ചത്.