മണൽക്കടത്തുകാരെ പിടികൂടാൻ എത്തിയ പോലീസ് സംഘം സഞ്ചരിച്ച വാഹനത്തെ മണൽ ലോറി ഇടിച്ച് അപായപ്പെടുത്താൻ ശ്രമം

പഴയങ്ങാടി : അനധികൃത മണൽ കടത്തിനെതിരെ ശക്തമായ നടപടിയുമായി പഴയങ്ങാടി പോലീസ് മുന്നോട്ടുപോകുന്നതിനിടെ മണൽ ലോറി പിടികൂടാനെത്തിയ പോലീസ് സംഘം സഞ്ചരിച്ച വാഹനത്തെ മണൽ ലോറിയിടിച്ച് അപായപ്പെടുത്താൻ ശ്രമം. ഇന്ന് പുലർച്ചെ 4 മണിയോടെ പഴയങ്ങാടി ബസ് സ്റ്റാൻ്റിന് സമീപത്താണ് സംഭവം. നമ്പർ പ്ലേറ്റ് മറച്ച് മണലുമായി പോയ ലോറിയെ പിടികൂടാൻ ശ്രമിച്ച എ.എസ്.ഐ.ഗോപിനാഥൻ, ഡ്രൈവർ ശരത് എന്നിവരെയാണ് ലോറിയിടിച്ച് രണ്ടു തവണ അപായപ്പെടുത്താൻ ശ്രമം നടന്നത്.ഇടിയുടെ ആഘാതത്തിൽ പോലീസ് വാഹനം തകർന്നു. പോലീസുകാർ പരിക്കേൽക്കാതെ രക്ഷപ്പെട്ടു

ഇടിച്ച ലോറി അമിത വേഗതയിൽ മാട്ടൂൽ കടപ്പുറം ഭാഗത്തേക്ക് രക്ഷപ്പെട്ടു. ഇടിച്ച ലോറിയെയും മണൽ കടത്തുകാരെയും കുറിച്ച് പോലീസിന് സൂചന ലഭിച്ചിട്ടുണ്ട്.പ്രദേശത്തെ നിരീക്ഷണ ക്യാമറകളിൽ നിന്നും ലോറിയുടെ ദൃശ്യം പോലീസിന് ലഭിച്ചിട്ടുണ്ട്. എ.എസ്.ഐ.ഗോപിനാഥിൻ്റെ പരാതിയിൽ പഴയങ്ങാടി പോലീസ് വധശ്രമത്തിന് കേസെടുത്ത് അന്വേഷണം തുടങ്ങി.