കണ്ണൂരിൽ ട്രൈലറിന് പിറകില്‍ ലോറിയിടിച്ച്‌ വയനാട് സ്വദേശി മരിച്ചു

  മുഴപ്പിലങ്ങാട് യൂത്ത് ജഗ്ഷനില്‍ വാഹന അപകടത്തില്‍ ഒരാള്‍ മരിച്ചു. കോഴിക്കോട് നിന്നും വരുന്ന പാര്‍സല്‍ ലോറിയിലെ ജീവനക്കാരന്‍ വയനാട് പടിഞ്ഞാറത്തല പന്തിപൊയിൽ സ്വദേശി സുബൈര്‍ (49) ആണ് മരിച്ചത്. വാഹനം ഓടിച്ച ഡ്രൈവര്‍ ജാബിര്‍(40) നും പരിക്കേറ്റു.കോഴിക്കോട് ഭാഗത്ത് നിന്നും വരുന്ന ട്രൈലറിന് പിന്നാലെ അതേ ഭാഗത്ത് നിന്നും വന്ന പാര്‍സല്‍ ലോറി ഇടിച്ചാണ് അപകടം.  പുലര്‍ച്ചെ അഞ്ചിനാണ് സംഭവം. അപകട വിവരം അറിഞ്ഞ ഉടനെ എടക്കാട് പൊലീസും തലശ്ശേരിയില്‍ നിന്നുള്ള ഫയര്‍ഫോഴ്സും എത്തിയാണ് രക്ഷാപ്രവര്‍ത്തനം നടത്തിയത് . അപകടത്തിൻ്റെ ആഘാതത്തില്‍ ലോറിയുടെ ഒരു വശം പൂര്‍ണമായും തകര്‍ന്നു. ഡ്രൈവറുടെ സീറ്റിന് ഇടത് ഭാഗം ഇരുന്ന സുബൈര്‍ ലോറിയില്‍ കുടുങ്ങിപ്പോയിരുന്നു. രക്ഷാപ്രവര്‍ത്തകര്‍ കാബിന്‍ തകര്‍ത്താണ് ഇദ്ദേഹത്തെ പുറത്തെത്തിച്ചത്. ഉടനെ ചാലയിലെ ആശുപത്രിയില്‍ എത്തിച്ചെങ്കിലും ജീവന്‍രക്ഷിക്കാനായില്ല.