കണ്ണൂരിൽ സ്കൂൾ ബസ് തകർത്ത പ്രതി പിടിയിൽ

കണ്ണൂർ: വിദ്യാലയത്തിന് മുന്നിൽ നിർത്തിയിട്ടിരുന്ന സ്കൂൾ ബസും ഓഫീസും തകർത്ത കേസിൽ പ്രതിയെ ടൗൺ പൊലീസ് അറസ്റ്റ് ചെയ്തു. തമിഴ്നാട് പെരിയസേലം ഉളുദൂർപേട്ട സ്വദേശി കെ. മുരുകേഷ് ആണ് പിടിയിലായത്.

ടൗൺ എസ്.ഐ. ടി.എം. വിപിന്റെ നേതൃത്വത്തിലുള്ള പൊലീസ് സംഘമാണ് പ്രതിയെ പയ്യാമ്പലം ഭാഗത്ത് നിന്ന് പിടികൂടിയത്.

പൊലീസിന്റെ വിവരമനുസരിച്ച്, മാനസികാസ്വാസ്ഥ്യം പ്രകടിപ്പിച്ച പ്രതിയെ കണ്ണൂർ ജില്ലാ ആശുപത്രിയിൽ വൈദ്യപരിശോധനയ്ക്ക് വിധേയനാക്കിയ ശേഷം കുതിരവട്ടം മാനസികാരോഗ്യ കേന്ദ്രത്തിലേക്ക് മാറ്റി.

കഴിഞ്ഞ ബുധനാഴ്ച പുലർച്ചെയാണ് പയ്യാമ്പലത്തെ ഗവ. ഗേൾസ് വൊക്കേഷണൽ ഹയർ സെക്കൻഡറി സ്കൂളിന് മുന്നിൽ നിർത്തിയിട്ടിരുന്ന ബസിന്റെ ഒരു വശത്തെ ചില്ലുകൾ തകർക്കുകയും വി.എച്ച്.എസ്.ഇ. ഓഫീസ് വാതിലിലെ ഗ്ലാസും നശിപ്പിക്കുകയും ചെയ്ത സംഭവം നടന്നത്.