അതിദാരുണം ...: കണ്ണൂരില്‍ കിണറ്റില്‍ വീണ പന്ത് എടുക്കാൻ ഇറങ്ങിയ പതിനാലുകാരൻ മരിച്ചു

കണ്ണൂർ : കണ്ണൂരില്‍ കളിക്കുന്നതിനിടെ കിണറ്റില്‍ വീണ പന്ത് എടുക്കാൻ ഇറങ്ങിയ പതിനാലുവയസുകാരൻ മരിച്ചു .കാട്ടാമ്പള്ളി സ്വദേശി മുഹമ്മദാണ് മരിച്ചത് . ഇന്ന് രാവിലെ എട്ട് മണിയോടെയാണ് അപകടമുണ്ടായത് .

കൊയ്യം മർക്കസില്‍ താമസിച്ച്‌ പഠിക്കുകയാണ് മുഹമ്മദ് . രാവിലെ കൂട്ടുകാരുമൊത്ത് കളിക്കുന്നതിനിടെ പന്ത് കിണറ്റില്‍ പോകുകയും , അതിന്റെ സമീപത്തേക്ക് എത്തിയ വിദ്യാർത്ഥി കിണറ്റിലേക്ക് വീഴുകയായിരുന്നു . കൂടെയുണ്ടായിരുന്ന കൂട്ടുകാർ നാട്ടുകാരെയും ഉസ്താദിനെയും വിവരമറിയിക്കുകയായിരുന്നു . കുട്ടിയെ കിണറ്റില്‍ നിന്നും പുറത്തെടുത്തെങ്കിലും ജീവൻ രക്ഷിക്കാൻ കഴിഞ്ഞില്ല . മൃതദേഹം പരിയാരം മെഡിക്കല്‍ കോളേജിലേക്ക് മാറ്റി .