കണ്ണൂരില്‍ പടക്കം പൊട്ടിത്തെറിച്ച്‌ ഒൻപതു വയസ്സുകാരൻ മരിച്ചു; ദാരുണമരണം കോണ്‍ഗ്രസ് പ്രവര്‍ത്തകരുടെ ആഹ്ലാദത്തിന് പിന്നാലെ

കണ്ണൂർ :അഴീക്കോട് പുന്നക്കപ്പാറയില്‍ പടക്കം പൊട്ടിത്തെറിച്ച്‌ ഒൻപതു വയസ്സുകാരൻ മരിച്ചു.

പുന്നക്കപ്പാറ കോണ്‍ഗ്രസ് ഓഫിസിന് സമീപമുണ്ടായ അപകടത്തില്‍ പുന്നക്കപ്പാറ കുഞ്ഞികിഴക്കയില്‍ വീട്ടില്‍ അമാൻ ആണ് മരിച്ചത്.വി.ഡി. സതീശൻ മുഖ്യമന്ത്രിയായി സത്യപ്രതിജ്ഞ ചെയ്യുന്നതില്‍ അഹ്ലാദം പ്രകടിപ്പിച്ച്‌ കോണ്‍ഗ്രസ് പ്രവർത്തകർ ലഡു വിതരണം നടത്തുകയും പടക്കം പൊട്ടിക്കുകയും ചെയ്തു.

ബാക്കി വന്ന പടക്കം ഒരു സ്ഥലത്ത് സൂക്ഷിച്ചുവച്ച ശേഷം പ്രവർത്തകർ പിരിഞ്ഞുപോയി. ഈ സമയം ഇവിടെയുണ്ടായിരുന്ന കുട്ടികള്‍ പടക്കം എടുത്ത് പൊട്ടിക്കുകയായിരുന്നു.

തീ കൊളുത്തി എറിഞ്ഞ പടക്കത്തില്‍ ഒന്ന് അമാന്റെ കഴുത്തിലാണ് വീണ് പൊട്ടിയത്. സാരമായി പരുക്കേറ്റ അമാനെ ഉടൻ തന്നെ അടുത്തുള്ള ആശുപത്രിയില്‍ എത്തിച്ചെങ്കിലും ജീവൻ രക്ഷിക്കാനായില്ല. 3 കുട്ടികള്‍ക്ക് നിസ്സാര പരുക്കേറ്റു.