റിലയൻസ് ജിയോ ഫ്രീ കോൾ അവസാനിപ്പിച്ചു, ഇനി മിനിറ്റിന് 6 പൈസ ഈടാക്കും

രാജ്യത്തെ മുന്‍നിര ടെലികോം സേവന ദാതാക്കളായ റിലയൻസ് ഫ്രീ വോയ്സ് കോൾ നിർത്തുന്നു. ഇനി മുതൽ മറ്റു നെറ്റ്‌വർക്കുകളിലേക്കുള്ള കോളുകൾക്ക് മിനിറ്റിന് 6 പൈസ ഈടാക്കും. എന്നാൽ സ്വന്തം നെറ്റ്‌വർക്ക് വഴിയുള്ള വോയ്സ് കോളുകൾക്ക് പണം ഈടാക്കുകയില്ല. ജിയോയുടെ എതിരാളികളുടെ സമ്മർദ്ദത്തെ തുടർന്നാണ് വോയ്സ് കോളുകൾക്ക് പണം ഈടാക്കാൻ ജിയോ നിർബന്ധിക്കപ്പെട്ടിരിക്കുന്നത്.

അതേസമയം, വോയ്സ് കോളുകൾക്ക് നഷ്ടപ്പെടുന്ന പണത്തിനു തുല്യ മൂല്യമുള്ള സൗജന്യ ഡേറ്റ നൽകി ജിയോ ഉപഭോക്താക്കൾക്ക് നഷ്ടപരിഹാരം നൽകും. ഉപയോക്താക്കൾ മറ്റ് ഓപ്പറേറ്റർമാരുടെ നെറ്റ്‌വർക്കിലേക്ക് വിളിക്കുന്ന ഫോൺ കോളുകൾക്ക് മിനിറ്റിന് 6 പൈസ ചാർജ് നിലനിൽക്കുമെന്ന് ജിയോ പ്രസ്താവനയിൽ പറഞ്ഞു.

മറ്റ് ജിയോ ഫോണുകളിലേക്ക് ജിയോ ഉപയോക്താക്കൾ നടത്തുന്ന കോളുകൾക്കും ലാൻഡ്‌ലൈൻ ഫോണുകൾക്കും വാട്സാപ്, ഫേസ്‌ടൈം, മറ്റ് പ്ലാറ്റ്ഫോമുകൾ എന്നിവ ഉപയോഗിച്ച് വിളിക്കുന്നതിനും ഈ നിരക്കുകൾ ബാധകമല്ല. എല്ലാ നെറ്റ്‌വർക്കുകളിൽ നിന്നുമുള്ള ഇൻകമിംഗ് കോളുകൾ സൗജന്യമായി തുടരും.

2017 ൽ ടെലികോം റെഗുലേറ്റർ ട്രായ് 14 പൈസയിൽ നിന്ന് മിനിറ്റിന് 6 പൈസയായി ഇന്റർകണക്ട് യൂസസ് ചാർജ് (ഐയുസി) വെട്ടിക്കുറച്ചിരുന്നു. ഇത് 2020 ജനുവരിയിൽ അവസാനിപ്പിക്കുമെന്നും പറഞ്ഞിരുന്നു. ജിയോ നെറ്റ്‌വർക്കിലെ വോയ്‌സ് കോളുകൾ സൗജന്യമായതിനാൽ, എതിരാളികളായ ഭാരതി എയർടെൽ, വോഡഫോൺ ഐഡിയ എന്നിവയ്ക്ക് നൽകിയ 13,500 കോടി ഡോളർ കമ്പനി വഹിക്കേണ്ടിവന്നു. ട്രായ് നീക്കം മൂലം ഉണ്ടായ നഷ്ടം നികത്താൻ, ഒരു എതിരാളിയുടെ നെറ്റ്‌വർക്കിലേക്ക് ഓരോ കോളിനും ഉപഭോക്താക്കൾക്ക് മിനിറ്റിൽ 6 പൈസ ഈടാക്കാൻ കമ്പനി തീരുമാനിക്കുകയായിരുന്നു.

ആദ്യമായാണ് ജിയോ ഉപയോക്താക്കൾ വോയ്‌സ് കോളുകൾക്ക് പണം നൽകുന്നത്. നിലവിൽ, ഡേറ്റയ്‌ക്ക് മാത്രമേ ജിയോ നിരക്ക് ഈടാക്കൂ, കൂടാതെ രാജ്യത്തെവിടെയും ഏത് നെറ്റ്‌വർക്കിലേക്കും വോയ്‌സ് കോളുകൾ സൗജന്യമാണ്. ബുധനാഴ്ച മുതൽ ജിയോ ഉപഭോക്താക്കൾ ചെയ്യുന്ന എല്ലാ റീചാർജുകൾക്കും, മറ്റ് മൊബൈൽ ഓപ്പറേറ്റർമാർക്കുള്ള കോളുകൾക്ക് നിലവിലുള്ള ഐയുസി നിരക്കിൽ മിനിറ്റിന് 6 പൈസ നിരക്കിൽ ഐയുസി ടോപ്പ്-അപ്പ് വൗച്ചറുകൾ വഴി ചാർജ് ചെയ്യപ്പെടും.

കഴിഞ്ഞ മൂന്ന് വർഷത്തിനുള്ളിൽ മറ്റ് ഓപ്പറേറ്റർമാരായ എയർടെൽ, വോഡഫോൺ-ഐഡിയ എന്നിവയ്ക്ക് 13,500 കോടി രൂപ നെറ്റ് ഐയുസി ചാർജായി നൽകിയിട്ടുണ്ടെന്ന് ജിയോ പറഞ്ഞു.