ഞങ്ങളുടെ ബാലാമണി തിരിച്ചു വന്നുവല്ലേ? നാടൻ ലുക്കിൽ നൃത്തമാടി നവ്യ നായർ [PHOTOS]

യുവജനോത്സവ വേദിയില്‍ നിന്നും സിനിമയിലേക്കെത്തി താരമായി മാറിയ നവ്യ നായര്‍ പ്രേക്ഷകരുടെ പ്രിയപ്പെട്ട അഭിനേത്രികളിലൊരാളാണ്. സിനിമയില്‍ നിറഞ്ഞുനിന്നിരുന്ന താരം വിവാഹത്തോടെ ഇടവേളയെടുക്കുകയായിരുന്നു. സിനിമയില്‍ സജീവമല്ലെങ്കില്‍ക്കൂടിയും സോഷ്യല്‍ മീഡിയയിലൂടെ മികച്ച സ്വീകാര്യതയും പിന്തുണയുമാണ് താരത്തിന് ലഭിച്ചുകൊണ്ടിരിക്കുന്നത്. സോഷ്യല്‍ മീഡിയയില്‍ സജീവമായ താരത്തിന്റെ ചിത്രങ്ങളും വീഡിയോയുമൊക്കെ ക്ഷണനേരം കൊണ്ടാണ് വൈറലായി മാറുന്നത്.

ഇഷ്ടം എന്ന സൂപ്പർഹിറ്റ് ചിത്രത്തിലൂടെ അഭിനയരംഗത്തേക്ക് കടന്നുവന്ന നവ്യാ നായർക്ക് ഒരു നടിയെന്ന നിലയിൽ വലിയ അംഗീകാരങ്ങൾ ലഭിച്ചത് രഞ്ജിത്ത് രചിച്ച് സംവിധാനം ചെയ്ത നന്ദനം എന്ന ചിത്രത്തിലൂടെയാണ്. ആ ചിത്രത്തിലെ ബാലാമണി എന്ന കഥാപാത്രം നവ്യാ നായർക്ക് നേടിക്കൊടുത്ത പ്രശസ്തി വളരെ വലുതാണ്. വിവാഹത്തിനു ശേഷം അഭിനയ ജീവിതത്തിൽ നിന്നും വിട്ടുനിന്ന നവ്യാനായർ ഇപ്പോൾ നൃത്ത പരിപാടികളിലും ടെലിവിഷൻ പരിപാടികളിലും സജീവമാണ്.

2014ല്‍ ‘ദൃശ്യ’ എന്ന കന്നഡ ചിത്രത്തിലാണ് താരം ഒടുവിലായി എത്തിയത്. അഭിനയ ലോകത്തുനിന്നും വിട്ടു നിന്ന താരം തിരിച്ചു വരവിനൊരുങ്ങുകയാണ്. 2012ല്‍ എത്തിയ ‘സീന്‍ ഒന്ന് നമ്മുടെ വീട്’ ആണ് താരം അവസാനമായി അഭിനയിച്ച മലയാള ചിത്രം. വി കെ പ്രകാശ് ഒരുക്കുന്ന ഒരുത്തീ എന്ന ചിത്രത്തിലൂടെയാണ് നവ്യ നായർ തിരിച്ചെത്തുന്നത്. ചിത്രത്തിന്റെ ലൊക്കേഷനിൽ നിന്നുമുള്ള ചിത്രങ്ങളാണ് ഇപ്പോൾ വൈറലായിരിക്കുന്നത്. സെറ്റുമുണ്ട് ഉടുത്ത് നാടൻ ലുക്കിൽ എത്തിയ പ്രിയ നായികയുടെ ചിത്രങ്ങൾ കണ്ട ആരാധകർ ഞങ്ങളുടെ ബാലാമണി തിരിച്ചു വന്നുവല്ലേ എന്നാണ് ചോദിക്കുന്നത്.