കൊച്ചിയില്‍ റോഡിലെ കുഴിയില്‍ വീണ് യുവാവിന് ദാരുണാന്ത്യം

കൊച്ചി: പാലാരിവട്ടം മെട്രോ സ്‌റ്റേഷന് സമീപം പൈപ്പ് പൊട്ടി റോഡിലുണ്ടായ കുഴിയില്‍ വീണ് ഇരുചക്രവാഹന യാത്രക്കാരന്‍ മരിച്ചു. കുനമ്മാവ് സ്വദേശി യദുലാലാണ് മരിച്ചത്. 23 വയസ്സായിരുന്നു. റോഡിലേക്ക് തെറിച്ചുവീണ യുവാവിന്റെ ശരീരത്തിലേക്ക് ലോറി കയറുകയായിരുന്നു. ഇന്ന് രാവിലെയായിരുന്നു അപകടം.

കുഴി കണ്ടയുടനെ വെട്ടിക്കുന്നതിനിടെ നിയന്ത്രണം വിട്ട് ഇരുചക്ര വാഹന യാത്രക്കാരന്‍ റോഡില്‍ തെറിച്ചുവീഴുകയായിരുന്നു. പിന്നാലെ വന്ന ലോറി യുവാവിന്റെ ദേഹത്ത് കയറുകയായിരുന്നു. ഉടന്‍ തന്നെ സമീപത്തെ സ്വകാര്യ ആശുപത്രിയിലെത്തിച്ചെങ്കിലും അപ്പോഴെക്കും മരണം സംഭവിച്ചിരുന്നു.

പാലാരിവട്ടം മെട്രോ സ്‌റ്റേഷന് സമീപത്താണ് ഒരടി താഴ്ചയുള്ള കുഴിയുള്ളത്. മാസങ്ങളോളമായുള്ള കുഴി അടയ്ക്കാന്‍ വാട്ടര്‍ അതോറിറ്റി തയ്യാറായിരുന്നില്ല. ഇതിനെതിരെ ജനങ്ങളുടെ പ്രതിഷേധം ഉണ്ടായിട്ടും കുഴിയടയ്ക്കാന്‍ വാട്ടര്‍ അതോറിറ്റി നടപടി സ്വീകരിച്ചില്ലെന്ന് ആരോപണം ഉയര്‍ന്നിരുന്നു.