സിപിഎം - മാവോവാദി ബന്ധത്തെക്കുറിച്ച്‌ കേന്ദ്ര ഏജന്‍സി അന്വേഷിക്കണം: ബിജെപി

കോഴിക്കോട്:  സിപിഎം-മാവോവാദി ബന്ധത്തെക്കുറിച്ച്‌ കേന്ദ്ര ഏജന്‍സി അന്വേഷിക്കണം എന്ന ആവശ്യവുമായി ബി.ജെ.പി കോഴിക്കോട് ജില്ല പ്രസിഡന്‍റ്​ ടി.പി. ജയചന്ദ്രന്‍. സി.പി.എം പ്രവര്‍ത്തകരായ യുവാക്കളെ മാവോവാദി ബന്ധത്തിന്റെ പേരിൽ യുഎപിഎ ചുമത്തി അറസ്​റ്റ്​ ചെയ്തതില്‍ പ്രതിഷേധവുമായി രംഗത്തുവന്ന സിപിഎം നിലപാട് ദേശദ്രോഹപരമാണെന്ന്​ ടി പി ജയചന്ദ്രന്‍ കുറ്റപ്പെടുത്തി. 

സിപിഎം ഭരിക്കുന്ന ആഭ്യന്തര വകുപ്പുതന്നെ പ്രതികള്‍ മാവോവാദികളാണെന്ന് പറയുമ്ബോള്‍ ജില്ല സെക്രട്ടറി പി. മോഹന​​ന്റെയും മറ്റു സിപിഎം നേതാക്കളുടെയും നിലപാട് ആഭ്യന്തര വകുപ്പിനും പിണറായി വിജയനുമെതിരാണ്. പൊലീസ് ഐ.ജിതന്നെ മാവോവാദികളാണെന്ന് പറഞ്ഞിട്ടും സിപിഎമ്മും കോണ്‍ഗ്രസും മുഖവിലക്കെടുക്കാതെ പ്രതികള്‍ക്കൊപ്പം നില്‍ക്കുന്നത് പ്രതിഷേധാര്‍ഹമാണ്. 

അട്ടപ്പാടിയിലെ സംഭവത്തില്‍ സിപിഎം സ്വീകരിച്ച നിലപാടില്‍നിന്ന്​ വ്യത്യസ്​ത നിലപാടാണ് കോഴിക്കോട്ട്​ സ്വീകരിച്ചത്. മാവോവാദി പ്രവര്‍ത്തനങ്ങളെക്കുറിച്ച്‌ ധവളപത്രം പുറത്തിറക്കി ജില്ലയില്‍ സ്വൈരജീവിതം ഉറപ്പുവരുത്താന്‍ സര്‍ക്കാര്‍ മുന്‍കൈയെടുക്കണമെന്നും ജയചന്ദ്രന്‍ ആവശ്യപ്പെട്ടു.

www.ezhomelive.com